Asnjë mësues me kontratë të përhershme nuk ka mbetur pa punë pas bashkimit të rreth 450 paraleleve në arsimin fillor dhe të mesëm, deklaroi ministrja e Arsimit dhe Shkencës, Vesna Janevska, në një intervistë për 4TV.
Sipas Janevskës, stafi i tepërt do të angazhohet përmes zgjerimit të qëndrimit gjithëditor të nxënësve në shkolla në të gjithë vendin.
Ajo shpjegoi se synimi është që nxënësit të qëndrojnë në shkollë nga ora 08:00 deri në 16:30, ku përveç mësimit të rregullt do të kenë aktivitete të ndryshme, seksione, aktivitete interaktive dhe kohë për kryerjen e detyrave të shtëpisë.
Sipas ministres, qëndrimi më i gjatë në shkollë nuk do të nënkuptojë vetëm mësim, por edhe mundësi për aktivitete si gjuhë të huaja, balet dhe sport. Ajo tha se në këtë mënyrë nxënësit do të kenë më pak detyrime pas kthimit në shtëpi.
Në lidhje me mësimin me një turn, Janevska tha se më shumë se gjysma e shkollave në vend tashmë funksionojnë në një turn – 583 shkolla fillore dhe 37 të mesme. Sipas saj, sfida më e madhe mbetet Shkupi, për shkak të migrimeve të vazhdueshme, ndërsa Ministria po punon për ndërtimin e klasave të reja dhe zgjerimin e kapaciteteve.
Janevska theksoi gjithashtu se reformat në arsim kërkojnë vazhdimësi dhe jo ndryshime të shpeshta të politikave me çdo përbërje të re qeverisëse, në mënyrë që rezultatet të mund të vlerësohen pas përfundimit të një cikli të plotë arsimor.
