Ministri për Evropën dhe Punët e Jashtme, Ferit Hoxha, priti në takim ambasadorin e ri të Shteteve të Bashkuara në Shqipëri, Eric Wendt.
Gjatë takimit, Hoxha vlerësoi marrëdhëniet me SHBA-në, duke i cilësuar ato si një partneritet strategjik të rëndësishëm për Shqipërinë, të mbështetur në vlera të përbashkëta, bashkëpunim në kuadër të NATO-s dhe lidhje të qëndrueshme mes dy vendeve.
Ai tha se pret që bashkëpunimi të thellohet më tej, veçanërisht në fushën e ekonomisë dhe investimeve, sigurisë dhe stabilitetit rajonal, si dhe në përballimin e sfidave ndërkombëtare.
Hoxha theksoi gjithashtu se anëtarësimi në Bashkimin Evropian dhe forcimi i partneritetit transatlantik me SHBA-në janë dy prioritete që ecin paralelisht për Shqipërinë.
Në fund, ministri i uroi mirëseardhjen ambasadorit Wendt dhe sukses në misionin e tij, duke shprehur gatishmërinë për një bashkëpunim të afërt dhe produktiv.
