Prokurimi i matësve elektrikë me vlerë prej rreth 13.2 milionë eurosh u bë temë e përplasjeve politike, pasi opozitarja LSDM ngriti akuza për lidhje të mundshme biznesore dhe politike rreth kompanisë së zgjedhur në procedurë, ndërsa ministrja e Energjisë, Minierave dhe Lëndëve të Para Minerale, Sanja Bozhinovska, i hodhi poshtë pretendimet dhe paralajmëroi hapa ligjorë nëse partia nuk i tërheq ato.
Sipas të dhënave të publikuara, kompania “METER&CONTROL” nga Serbia është zgjedhur në procedurën për prokurimin e matësve, ndërsa vlera e kontratës së publikuar më 11 gusht të këtij viti është rreth 812.4 milionë denarë, përkatësisht afërsisht 13.2 milionë euro.
LSDM-ja ditët e fundit pretendon se “METER&CONTROL” është e lidhur me “Rudnap Group” përmes historisë së saj pronësore dhe këtë lidhje e vendos në kontekst me angazhimin e mëparshëm profesional të ministres Bozhinovska. Nga partia thonë se Bozhinovska gjatë periudhës 2011–2014 ka punuar në pozita drejtuese në kompani të lidhura me “Rudnap Group” në Evropën Qendrore dhe Lindore. LSDM-ja kërkon që institucionet kompetente t’i kontrollojnë pretendimet e tyre.
Bozhinovska sot i hodhi poshtë kategorikisht akuzat, duke i cilësuar si konstruktime politike dhe kërkoi nga LSDM-ja t’i tërheqë ato. Ajo pretendon se për më shumë se 12 vjet nuk ka asnjë lidhje biznesore apo private me “Rudnap”, si dhe se nuk ka asnjë lidhje me prokurimin ose me procedurën e zhvilluar nga EVN. Sipas saj, bëhet fjalë për një procedurë të një kompanie private, e cila në mënyrë të pavarur i zhvillon prokurimet për nevojat e veta. Bozhinovska paralajmëroi se, nëse LSDM-ja nuk i tërheq pretendimet, do t’i përdorë mekanizmat ligjorë në dispozicion për mbrojtjen e reputacionit dhe integritetit të saj.
Nga LSDM-ja u përgjigjën se nuk do të kërkojnë falje dhe përsëri iu referuan të dhënave për angazhimet e mëparshme profesionale të Bozhinovskës, duke vlerësuar se ato janë relevante për çështjet që i ngrenë në opinion.
Sa i përket vetë procedurës, nga EVN Maqedoni theksojnë se prokurimi është zhvilluar në përputhje me rregulloret ligjore dhe procedurat e përcaktuara paraprakisht.
“EVN Maqedoni e zhvilloi procedurën e prokurimit të matësve në përputhje të plotë me rregulloret ligjore në fuqi dhe procedurat e përcaktuara. Gjatë procesit të vlerësimit u zbatuan në mënyrë të vazhdueshme të gjitha kriteret dhe kërkesat përkatëse, përfshirë përmbushjen e kushteve për aftësi teknike dhe profesionale, përputhshmërinë me kërkesat e specifikimit teknik, si dhe verifikimin për ekzistencën eventuale të arsyeve për përjashtimin e ofertuesve nga procedura”, thonë nga kompania.
Nga EVN shtojnë se zgjedhja e ofertuesit është bërë ekskluzivisht në bazë të rezultateve të procedurës.
“Zgjedhja e ofertuesit është rezultat ekskluzivisht i procedurës së zhvilluar dhe përmbushjes së kritereve dhe kërkesave të përcaktuara paraprakisht. Kompania distancohet nga çfarëdo interpretimesh apo kualifikimesh politike lidhur me zgjedhjen e ofertuesit”, thuhet në qëndrimin e EVN Maqedoni.
Dokumentacioni i publikuar i tenderit tregon se procedura është zhvilluar përmes negocimit me shpallje paraprake, se kriter për dhënien e kontratës ka qenë çmimi më i ulët, si dhe se nga ofertuesit janë kërkuar dëshmi konkrete për aftësi teknike dhe profesionale, ndër të cilat furnizime të mëparshme të një numri të konsiderueshëm matësish në të paktën tri shtete, mostra, softuer dhe certifikata përkatëse.
Ndërrimi i matësve është pjesë e një cikli investimesh që zhvillohet në kuadër të projekteve për digjitalizimin e shërbimeve. Ndërrimi i matësve është pjesë e procesit për harmonizimin e plotë të sistemit të shpërndarjes me standardet e Bashkimit Evropian dhe ai po zhvillohet intensivisht gjatë tre-katër viteve të fundit dhe do të vazhdojë edhe në periudhën e ardhshme.
