Kryeministri Hristijan Mickoski të hënën iu drejtua samitit prestigjioz “Concordia” në Nju Jork, i cili zhvillohet paralelisht me Asamblenë e Përgjithshme të Kombeve të Bashkuara.
Në një panel me zëvendëskryeministren e Gjeorgjisë, Maka Boçorišvili, kryeministri Mickoski foli për pengesat në procesin e integrimit evropian dhe për përpjekjet e disa vendeve anëtare të BE-së për ta përdorur këtë proces për ndryshimin e identitetit maqedonas. Sipas tij, nga Brukseli po dëgjohen edhe mesazhe pozitive.
„Ne e filluam udhëtimin tonë para pothuajse dy dekadash e gjysmë. Dhe, për fat të keq, për shkak të disa arsyeve artificiale, nuk arritëm të bëhemi pjesë e BE-së. Ndoshta një ditë do ta arrijmë këtë gur themeli. Ndërkohë, frustrimi te qytetarët maqedonas është i madh, sepse në të kaluarën kemi bërë shumë lëshime: ndryshuam flamurin, Kushtetutën e ndryshuam disa herë, madje ndryshuam edhe emrin kushtetues, dhe e gjithë kjo na duket si një histori pa fund“, tha Mickoski.
Ai shtoi se Maqedonia beson në vlerat evropiane dhe do të vazhdojë në këtë rrugë, duke kërkuar zgjidhje për situatën aktuale.
„Për ne, për gjeneratën time, negociatat me BE-në ishin një mënyrë për të ndryshuar institucionet – jo për të ndryshuar identitetin. Për fat të keq, ka disa vende anëtare që përpiqen të zgjidhin çështje dypalëshe dhe jo të ndryshojnë institucionet tona, por identitetin tonë“, deklaroi Mickoski.
Në lidhje me mesazhet nga Brukseli, kryeministri tha se ato nga samiti i BE-së dhe vendeve të Ballkanit Perëndimor në Tivat ishin jashtëzakonisht pozitive.
Mickoski theksoi gjithashtu se Maqedonia e Veriut e ka harmonizuar plotësisht politikën e saj të përbashkët të jashtme dhe të sigurisë me BE-në dhe se legjislacioni i vendit është në masë të madhe i harmonizuar me atë të Bashkimit Evropian.
„Ne nuk jemi vetëm duke pritur. Ne punojmë për zhvillimin tonë, e përfundojmë detyrën tonë të shtëpisë, nuk e humbim kohën, përkundrazi – ky është guri ynë strategjik i themelit dhe do të mbetemi në këtë rrugë“, tha kryeministri.
Mickoski foli edhe për partneritetin strategjik me Shtetet e Bashkuara, duke theksuar bashkëpunimin në industrinë ushtarake, energjetikë dhe në nxjerrjen e mineraleve kritike.
Ai përmendi edhe projektet infrastrukturore dhe energjetike, përfshirë gazsjellësit që lidhin vendin me Greqinë dhe Serbinë, si dhe rëndësinë strategjike të Korridorit 8 dhe Korridorit 10.
„Korridori 10 lidh Detin Egje dhe Mesdheun me vendet e Evropës Qendrore, ndërsa Korridori 8 lidh Detin Jon dhe Adriatik me vendet e Detit të Zi. Të dy korridoret janë shumë të rëndësishëm për krahun lindor të NATO-s“, tha Mickoski.
Në samitin “Concordia”, kryeministri foli edhe për rezultatet ekonomike të vendit. Sipas tij, të dhënat për tremujorin e dytë të vitit 2026 tregojnë rritje reale ekonomike prej 4,3 për qind, ndërsa rritja nominale është mbi 8 për qind.
Mickoski tha se kjo e vendos vendin ndër ekonomitë me rritjen më të lartë në Evropë dhe theksoi se inflacioni në gusht ishte nën mesataren evropiane.
Ai vlerësoi se ekonomia e vendit është në gjendje të mirë dhe se, pavarësisht krizave në Evropë dhe Lindjen e Mesme, qeveria po vazhdon me projektet për zhvillimin ekonomik, energjetik dhe infrastrukturor të vendit.
