Sekretari i Përgjithshëm i NATO-s, Mark Rutte, deklaroi se sulmet e vazhdueshme të Rusisë ndaj Ukrainës po prodhojnë efekt të kundërt, duke forcuar vendosmërinë e aleancës për të vazhduar mbështetjen për Ukrainën.
Rutte tha se Rusia po pëson humbje të mëdha në luftë, ndërsa sipas tij presidenti rus Vladimir Putin nuk po tregon gatishmëri për t’i dhënë fund konfliktit.
“Rusia po pëson humbje të jashtëzakonshme, të cilat tani vlerësohen në më shumë se 40 mijë të vrarë ose të plagosur rëndë çdo muaj”, tha Rutte.
Ai theksoi se Rusia vazhdon sulmet ndaj Kievit dhe pjesëve të tjera të Ukrainës, ndërsa akuzoi Moskën edhe për aktivitete hibride në vende të ndryshme evropiane, përfshirë sulme kibernetike, sabotime, zjarrvënie, shkelje të hapësirës ajrore dhe incidente me dronë.
Sipas Rutte, veprimet e fundit të Rusisë janë të rrezikshme dhe paraqesin kërcënim për jetën, por NATO nuk do të tërhiqet për shkak të tyre.
“Putini mendon se mund të na përçajë, të na destabilizojë dhe ta dobësojë mbështetjen tonë për Ukrainën. Por ai do të dështojë. Këto veprime keqdashëse po japin efektin e kundërt”, deklaroi sekretari i Përgjithshëm i NATO-s.
