Nënkryetari i Qeverisë, Izet Mexhiti, ka akuzuar BDI-në se gjatë kohës sa ishte në pushtet ka mundësuar shtrirjen e ndikimit serb në Maqedoninë e Veriut, përmes politikës, nëntokës dhe sektorit financiar.
Në një reagim të publikuar në Facebook, Mexhiti ka rikujtuar paralajmërimet e tij nga vitet 2021, 2022 dhe 2023, kur, sipas tij, kishte ngritur shqetësimin për depërtimin e asaj që e quan “bota serbe” në shoqërinë e vendit.
Duke iu referuar dokumentit zyrtar përmes të cilit, sipas tij, qeveria e atëhershme LSDM-BDI i hapi rrugë ardhjes së Alta Bankës në Maqedoninë e Veriut, Mexhiti ka thënë se ndikimi serb ishte shtrirë në tri segmente kryesore: përmes projektit “Ballkani i Hapur”, mafies së bixhozit dhe sektorit bankar.
