Kryeministri Hristijan Mickoski deklaroi se pretendimet e LSDM-së për bllokimin e Alta Bankës për shkak të kapitalit rus janë rrëzuar gjatë debatit të sotëm mbikëqyrës në Kuvend.
Duke folur në edicionin e lajmeve të TV Sitel, Mickoski tha se as Mali i Zi dhe as rregullatori austriak nuk e kanë bllokuar bankën për këtë arsye, siç pretendonte opozita.
Ai përmendi rastin e Davor Macurës, të cilit, sipas tij, rregullatori austriak i ka lejuar të marrë pak më pak se 10 për qind të aksioneve të Adiko Bankës, si dhe të hyjë në marrëdhënie afariste me Raiffeisen Bankën.
Mickoski e cilësoi përpjekje për politizim të çështjes pretendimin e opozitës dhe tha se debati i sotëm i ka rrëzuar këto akuza.
Sa i përket përfshirjes së tij në gjetjen e një blerësi për Alta Bankën, kryeministri theksoi se nuk ka kompetenca formale për të shitur apo blerë banka, por si kryetar i Qeverisë do të angazhohet për zgjidhjen e problemit.
„Nëse nuk dini ose nuk dëshironi të ndihmoni, të paktën na lini të gjejmë një mënyrë për ta zgjidhur problemin. Jam i bindur se do të gjejmë një mënyrë për të shpëtuar atë që mund të shpëtohet, në mënyrë që punonjësit, kreditorët dhe banka të mund të vazhdojnë të funksionojnë“, deklaroi Mickoski.
