Kontrollet ndaj subvencioneve në bujqësi pritet të shtohen pas deklarimeve për rendimente të dyshuara si joreale, ndërsa fermerët dhe institucionet kanë qëndrime të ndryshme për burimin e parregullsive të mundshme.
Ministri i Bujqësisë, Pylltarisë dhe Ekonomisë së Ujërave, Borçe Serafimovski, ka bërë të ditur se janë evidentuar raste që lidhen me raportime të dyshimta për prodhime bujqësore, duke përmendur sasi të larta të duhanit, qumështit dhe parregullsi me të dhënat e bagëtive dhe sipërfaqeve bujqësore.
Sipas tij, gjatë kontrolleve janë hasur raste ku janë raportuar rendimente që, sipas institucioneve, nuk përputhen me kapacitetet reale të prodhimit. Për këtë arsye, ai paralajmëroi kontrolle më të rrepta në sistemin e subvencioneve.
Kryeministri Hristijan Mickoski gjithashtu ka deklaruar se duhet të raportohen të dhëna reale, pasi subvencionet financohen nga buxheti i shtetit dhe kërkojnë një sistem të saktë evidentimi.
Nga ana tjetër, përfaqësuesit e fermerëve kundërshtojnë që përgjegjësia të bartet te prodhuesit. Ata theksojnë se të dhënat për sasitë e dorëzuara zakonisht i raportojnë kompanitë grumbulluese, përpunuesit dhe thertoret, të cilat kanë detyrimin të regjistrojnë prodhimin.
Kryetari i Rrjetit Kombëtar të Bujqve, Gjorgji Karakashev, vlerëson se nëse ka pasur keqpërdorime, kontrollet duhet të përqendrohen te subjektet që i fusin të dhënat në sistem dhe jo te fermerët që dorëzojnë prodhimin.
Edhe përfaqësues të tjerë të bujqve theksojnë se rendimentet ndryshojnë nga rajoni në rajon dhe se institucionet duhet të marrin parasysh kushtet reale të prodhimit.
Debati për subvencionet tashmë është kthyer në një përplasje mes institucioneve dhe fermerëve lidhur me atë se ku qëndron përgjegjësia për të dhënat e raportuara dhe mënyrën e kontrollit të tyre.
