Avokati Alban Duraj ka dhënë detaje të reja lidhur me rastin e Bleona Matës, vajzës që prej vitesh rezulton e zhdukur.
I ftuar në emisionin “Breaking me Fiori Dardha”, Duraj tha se kishte komunikuar me nënën e Bleonës, Bukurie Mata, e cila i kishte deklaruar se vajza është identifikuar në një nga vendet e Bashkimit Evropian.
Sipas avokatit, familja ka angazhuar një agjenci që merret me hetimin dhe gjetjen e personave të zhdukur. Duraj tha se, bazuar në informacionin që i është dhënë, Bleona aktualisht është studente dhe është birësuar nga një çift grek.
“Është studente, madje e shkëlqyer, ekselente dhe është e birësuar nga një çift grek. Kaq më tha për momentin”, deklaroi Duraj.
Ai shtoi se Bukurie Mata i kishte thënë se janë shumë pranë gjetjes së Bleonës dhe se, nëse arrin të takohet me të, do të kërkojë përgjegjësi për personat që dyshon se kanë pasur rol në zhdukjen e saj, si dhe për zyrtarët që, sipas saj, nuk kanë vepruar për zbardhjen e rastit.
Duraj tha se familja ka përdorur edhe një pjesë të parave të mbledhura nga qytetarët shqiptarë për angazhimin e agjencisë investigative.
Deri tani, këto informacione janë deklarata të përcjella nga avokati dhe nuk ka në material një konfirmim zyrtar nga autoritetet për vendndodhjen apo identitetin aktual të Bleona Matës.
