Këshilli Gjyqësor po shqyrton situatën në Gjykatën Themelore të Kumanovës pas ankesave të punonjësve ndaj kryetares së gjykatës, Snezhana Manev.
Për këtë çështje janë formuar dy komisione, ndërsa raportet e tyre ndodhen në fazën përfundimtare. Anëtari i Këshillit Gjyqësor, Ivica Nikollovski, tha se situata po ndiqet prej një kohe dhe se raportet pritet të shqyrtohen në një nga seancat e ardhshme.
Sipas tij, raportet do të përmbajnë konstatimet nga vizitat e zhvilluara në gjykatë, si dhe informacionet e mbledhura nga palët e përfshira.
Ndërkohë, Sindikata UPOZ ka kërkuar reagim lidhur me ankesat e punonjësve. Nga sindikata është bërë e ditur se 75 nga 90 punonjës të administratës gjyqësore kanë nënshkruar ankesën, përmes së cilës kërkohet shkarkimi i kryetares Manev.
Punonjësit pretendojnë se prej vitesh janë përballur me fyerje, presione dhe sjellje të papërshtatshme.
Kryetarja Manev i ka mohuar akuzat, duke i cilësuar ato si të pasakta dhe të përgjithshme. Sipas saj, pas reagimeve qëndron një grup i caktuar punonjësish, ndërsa çështja lidhet edhe me një procedurë disiplinore ndaj administratorit të gjykatës.
