Presidenti amerikan, Donald Trump u ankua se nuk mori Çmimin Nobel për Paqen për vitin 2026, një vit në të cilin nisi një luftë me Iranin.
Në atë që duhej të ishte një tubim për kandidatët e tjerë republikanë në Sirakuzë, Nju Jork, presidenti amerikan i kushtoi një pjesë të gjatë të fjalimit të tij shprehjes së pakënaqësive ndaj Komitetit të Nobelit, raporton The Guardian.
„Shtetet e Bashkuara të Amerikës, të përfaqësuara nga unë si presidenti juaj, duhej të kishin marrë Çmimin Nobel për Paqen, por nuk e morën. Dhe kjo është një njollë e pashlyeshme mbi shtetin e Norvegjisë dhe mbi ata njerëz që morën një vendim të tillë të turpshëm dhe poshtërues,“ tha Trump.
“Çmimi Nobel për Paqen është diskredituar përgjithmonë nga disa ideologë radikalë që janë anti-demokratikë dhe me të vërtetë armiq të qytetërimit,“ vazhdoi Trump.
“Norvegji, nuk do ta harrojmë se nuk e dhatë këtë çmim.“
Trump gjithashtu recitoi një listë luftërash që ai pretendon se i ka zgjidhur, disa prej të cilave nuk ishin luftime aktive dhe disa të tjera që ende nuk janë zgjidhur, përpara se të shtohej: „Jam në rrugë e sipër për të zgjidhur ose fituar edhe dy të tjera: Iranin dhe Rusinë-Ukrainën.“
Trump tha se do t’i përfundojë të dyja luftërat „shpejt“.
“Po ju meqë ra fjala,“ shtoi ai me zymtësi. „Irani do të jetë shumë i shpejtë në një mënyrë apo në një tjetër: ose do të na japin gjithçka, ose nuk do të ekzistojnë më.“
“Për më tepër, unë e parandalova Iranin nga zotërimi i armëve bërthamore dhe nga shpërthimi i të gjithë Lindjes së Mesme e përfundimisht shumë përtej saj, përfshirë Evropën e ndoshta edhe SHBA-në, dhe kam shpëtuar më shumë jetë se kushdo tjetër në histori,“ pretendoi Trump, pavarësisht faktit se agjencitë amerikane të inteligjencës raportuan në Kongres në vitin 2025 se Irani faktikisht e kishte ndërprerë kërkimin e tij për armë bërthamore që në vitin 2003.
“Pavarësisht e gjithë kësaj dhe të gjitha këtyre arritjeve të pabesueshme, Çmimi Nobel sot iu dha një figure me pikëpamje liberale që punon në Kombet e Bashkuara, për të cilën askush nuk ka dëgjuar kurrë më parë,“ tha Trump për Navi Pillay, ish-shefen e OKB-së për të drejtat e njeriut nga Afrika e Jugut, e cila kryesoi komisionin e OKB-së që doli në përfundimin se Izraeli është fajtor për gjenocid në Gazë.(INA)
