Kryetari i Komunës së Strugës, Mendi Qyra, ka zhvilluar takim me përfaqësues të Institutit për Krimet e Kryera Gjatë Luftës në Kosovë, në kuadër të angazhimeve për dokumentimin dhe ruajtjen e dëshmive historike që lidhen me periudhën e luftës në Kosovë.
Gjatë takimit është diskutuar për mundësinë e bashkëpunimit dhe krijimit të hapësirave për mbledhjen e dëshmive, dokumenteve dhe materialeve që mund të kontribuojnë në dokumentimin e krimeve të kryera gjatë luftës.
Komuna e Strugës shpreh gatishmërinë për të mbështetur këtë proces, duke ofruar mundësi që qytetarët dhe familjet që posedojnë dokumente apo dëshmi relevante të kenë mundësi t’i dorëzojnë ato tek përfaqësuesit e Institutit.
Instituti për Krimet e Kryera Gjatë Luftës në Kosovë ka për mandat hulumtimin dhe dokumentimin e krimeve të kryera gjatë periudhës së luftës, si dhe ruajtjen e materialeve dhe dëshmive për brezat e ardhshëm.
Takimi në Strugë shihet si një hap i rëndësishëm në drejtim të ruajtjes së kujtesës historike dhe dokumentimit të fakteve, me qëllim që dëshmitë e luftës të ruhen dhe të trajtohen në mënyrë institucionale.
