Deputeti i Partisë Demokratike të Kosovës, Eman Rrahmani, ka kërkuar që çështja e ish-krerëve të Ushtrisë Çlirimtare të Kosovës të jetë një nga temat kryesore gjatë vizitës së paralajmëruar të kryeministrit Albin Kurti në Shtetet e Bashkuara.
Duke komentuar aktgjykimin e 16 shtatorit në Dhomat e Specializuara të Kosovës në Hagë, Rrahmani e ka cilësuar vendimin si të padrejtë dhe ka thënë se institucionet e Kosovës duhet të ndërmarrin hapa në lidhje me të.
Katër ish-krerët e UÇK-së, Hashim Thaçi, Kadri Veseli, Rexhep Selimi dhe Jakup Krasniqi, u shpallën fajtorë për disa akuza për krime lufte. Thaçi dhe Krasniqi u dënuan me nga 25 vjet burgim, Veseli me 18 vjet, ndërsa Selimi me 13 vjet. Vendimi është i shkallës së parë dhe mund të apelohet.
Rrahmani ka thënë se përgjegjësia për reagimin institucional u takon Kuvendit, Presidencës dhe Qeverisë.
Ai ka kritikuar gjithashtu Kurtin lidhur me vizitën e tij të paralajmëruar në SHBA, duke argumentuar se çështja e aktgjykimit në Hagë duhet të diskutohet gjatë takimeve të tij.
Sipas Rrahmanit, çështja e ish-krerëve të UÇK-së duhet të jetë në fokus të angazhimit të institucioneve të Kosovës pas aktgjykimit.
