Kompania OKTA njoftoi se ka shënuar rezultate të fuqishme financiare gjatë tremujorit të dytë dhe gjashtëmujorit të parë të vitit 2026, të mbështetura nga rritja e aktivitetit tregtar dhe përmirësimet në zinxhirin e furnizimit.
Sipas kompanisë, të ardhurat nga shitja në tremujorin e dytë arritën në 19,894 miliardë denarë, ose 121% më shumë krahasuar me të njëjtën periudhë të vitit të kaluar. Ndërkohë, EBITDA u rrit me 88%, duke arritur në 249 milionë denarë, ndërsa EBITDA e korrigjuar arriti në 702 milionë denarë, që paraqet një rritje prej 319%.
Në nivel gjashtëmujori, kompania raportoi 32,485 miliardë denarë të ardhura nga shitja, ndërsa fitimi neto u rrit në 1,181 miliardë denarë, ose 448% më shumë krahasuar me gjashtëmujorin e parë të vitit 2025. Fitimi para tatimit arriti në 1,325 miliardë denarë, ndërsa EBITDA u rrit me 440%, në 1,344 miliardë denarë.
OKTA thekson se gjatë kësaj periudhe ka përmirësuar sigurinë e furnizimit dhe efikasitetin logjistik përmes përdorimit të produktsjellësit Selanik–Shkup për transportin e naftës dizel. Gjithashtu, kompania realizoi transaksionin e parë në tregun intraditor të energjisë elektrike MEMO, si pjesë e strategjisë për diversifikim në sektorin energjetik.
Në aspektin korporativ, Kuvendi i Përgjithshëm i aksionarëve më 28 maj miratoi shpërndarjen e dividendës prej 182,8 milionë denarësh, ose 240 denarë për aksion, e cila pritet të paguhet gjatë tremujorit të tretë të vitit.
Sipas kompanisë, gjatë gjashtëmujorit të parë janë realizuar edhe programe zbritjesh për karburantet, duke gjeneruar kursime të vlerësuara prej rreth 7 milionë eurosh për konsumatorët.
Megjithatë, OKTA vlerëson se paqëndrueshmëria e tregjeve ndërkombëtare të naftës, zhvillimet gjeopolitike dhe luhatjet në ofertë e kërkesë do të vazhdojnë të mbeten faktorë që mund të ndikojnë në rezultatet financiare edhe në periudhat në vijim.
