Nëntë vende evropiane, mes tyre Greqia, thuhet se kanë shtyrë zbatimin e plotë të Sistemit të Hyrjes/Daljes (EES), duke kërkuar më shumë kohë për të përgatitur teknologjinë dhe infrastrukturën e nevojshme.
Sipas raportimeve të mediave greke dhe britanike, në listë janë Franca, Belgjika, Holanda, Gjermania, Greqia, Malta, Portugalia, Italia, si dhe Zvicra.
EES parashikon regjistrimin e shtetasve jashtë BE-së që udhëtojnë në zonën Shengen përmes marrjes së gjurmëve të gishtërinjve dhe skanimit të fytyrës gjatë hyrjes dhe daljes.
Shtyrja lidhet me shqetësimet për radhët dhe ngarkesën në pikat kufitare, si dhe me probleme teknike gjatë zbatimit të sistemit. Gjatë verës, radhë të gjata janë raportuar edhe në kufijtë veriorë të Greqisë me Shqipërinë, Maqedoninë e Veriut, Bullgarinë dhe Turqinë.
Zbatimi i EES ka nisur gradualisht në tetor të vitit të kaluar. Pas një periudhe kalimtare prej 150 ditësh, gjatë së cilës vendet mund të pezullonin përkohësisht kontrollet gjatë periudhave me fluks të lartë, afati përfundoi më 6 shtator.
Sipas Sunday Times, nëntë vendet kanë njoftuar Komisionin Evropian se nuk janë ende në gjendje t’i zbatojnë plotësisht kontrollet e reja. Komisioni Evropian nuk ka pranuar të komentojë raportimet.
