Kryeministri i Maqedonisë së Veriut, Hristijan Mickoski, në një intervistë për emisionin „Klik Plus“ në TV21, deklaroi se Bullgaria mund të bëhet strehë për kriminelët e dënuar, të cilët mund ta keqpërdorin rastin e Iva Mihailovës dhe babait të saj për t’iu shmangur drejtësisë.
Mickoski pretendon se Mihailova e ka kaluar ilegalisht kufirin dhe hodhi poshtë pretendimet e paraqitura nga avokati i saj. Ai theksoi se Ministria e Punëve të Brendshme po e heton rastin dhe se së shpejti priten përgjigje konkrete.
Kryeministri gjithashtu akuzoi se ekziston një veprim i koordinuar mes opozitës maqedonase dhe mediave bullgare, me qëllim që t’i shkaktohet dëm Qeverisë. Sipas tij, të dyja palët po përhapin të njëjtën tezë, se rasti ishte i marrëveshur paraprakisht.
„Nëse është e marrëveshur, tani ekziston një fletarrestim ndërkombëtar. Ju lutem, ekstradojini, sepse kemi një fletarrestim ndërkombëtar. Nëse nuk i ekstradojnë, kjo do të thotë se teza e tyre nuk është e vërtetë“, deklaroi Mickoski.
Ai paralajmëroi se rasti do të ngrihet edhe para partnerëve ndërkombëtarë, përfshirë NATO-n dhe Bashkimin Evropian. Sipas Mickoskit, është shqetësuese që një vend partner në NATO mund të shndërrohet në strehë për persona të dënuar që i shmangen drejtësisë.
„Nuk do të doja që një kriminel i dënuar të bëhet shkak për moszbatimin e drejtësisë“, theksoi kryeministri, duke shtuar se pret që Iva Mihailova dhe babai i saj, herët a vonë, të përgjigjen para drejtësisë.
Mickoski theksoi se Qeveria nuk do të reagojë në mënyrën që, sipas tij, kanë pritur forca të caktuara politike, por do të vazhdojë të bëjë thirrje për dialog dhe gjetjen e zgjidhjeve për çështjet e hapura.
