Manasievski akuzon ish-kryeministrin Zoran Zaev, ish-ministrin e Shëndetësisë Venko Filipçe dhe ish-kryeministrin Dimitar Kovaçevski për afërsi me presidentin serb Aleksandar Vuçiq. Sipas tij, tre politikanët kanë promovuar interesat serbe, bullgare dhe ruse, në vend të interesave maqedonase.
Në një deklaratë të shoqëruar me video, Manasievski kujtoi periudhën e pandemisë COVID-19, duke pretenduar se Venko Filipçe e kishte pritur me ceremoni donacionin e vaksinave nga Serbia dhe Vuçiqi, me qëllim që të përfitonte politikisht nga furnizimi me vaksina.
Ai foli edhe për Zoran Zaevin, duke përmendur një bisedë me humoristë rusë, në të cilën, sipas tij, Zaev kishte folur negativisht për Vuçiqin, por më pas i kishte kërkuar falje presidentit serb. Manasievski përmendi gjithashtu pritjet dhe falënderimet publike që Zaev i kishte bërë Vuçiqit.
Sa i përket Dimitar Kovaçevskit, Manasievski tha se ai kishte pasur marrëdhënie të afërta me presidentin serb, duke kujtuar momentet kur, sipas tij, të dy kishin kënduar dhe festuar deri në orët e para të mëngjesit.
„Botën serbe në Maqedoni e promovuan Zaev, Filipçe dhe Kovaçevski. Promovuan edhe atë bullgare dhe ruse, por jo atë maqedonase”, deklaroi Manasievski, duke shtuar se, sipas tij, kjo është arsyeja pse qytetarët nuk u japin më besimin e tyre politik.
Deklaratat e Manasievskit janë akuza politike të drejtuara ndaj ish-funksionarëve të LSDM-së.
