VMRO-DPMNE ka reaguar ndaj vendimit të Prokurorisë Publike për Ndjekjen e Krimit të Organizuar dhe Korrupsionit (OJO GOKK) për mbylljen e lëndës lidhur me ndërtimin e 19 spitaleve modulare gjatë pandemisë së COVID-19.
Reagimi është bërë nga zëdhënësi i partisë, Valentin Manasievski, i cili e lidhi rastin edhe me zjarrin në spitalin modular në Tetovë, ku në shtator të vitit 2021 humbën jetën 14 persona.
Sipas Manasievskit, lënda ishte formuar më 10 shtator 2021, ndërsa më 20 gusht 2026 OJO GOKK ka vlerësuar se nuk ekziston bazë për dyshim për keqpërdorim të pozitës dhe autorizimeve zyrtare gjatë procedurave të prokurimit.
VMRO-DPMNE pretendon se ish-ministri i Shëndetësisë, Venko Filipçe, kishte përgjegjësi për vendosjen e spitaleve modulare. Manasievski akuzoi se nuk ishin përcaktuar specifikimet e nevojshme teknike dhe se nuk ishte përgatitur dokumentacion për instalimet elektrike.
Ai pretendoi gjithashtu se spitali modular në Tetovë ishte vendosur mbi një rezervuar të një pompe karburanti.
“Islam Abazi e shpëtoi Filipçen”, deklaroi Manasievski, duke kritikuar vendimin e Prokurorisë dhe duke pretenduar se lënda për vite me radhë ka kaluar nëpër faza të ndryshme të procedimit.
Nga VMRO-DPMNE përmendën se lënda fillimisht ishte udhëhequr nga prokurorja Vilma Ruskoska, ndërsa më pas ishte marrë nga Elizabeta Josifovska.
Manasievski tha se edhe pas vendimit të Prokurorisë për mbylljen e lëndës, çështja e përgjegjësisë për rastin mbetet temë politike.
Prokuroria, nga ana tjetër, ka bërë të ditur se pas shqyrtimit të dokumentacionit dhe provave të mbledhura nuk janë konstatuar fakte që do të tregonin për kryerjen e veprës penale dhe se nuk ka bazë për procedim të mëtejshëm.
