Çmimet e gazit natyror në Evropë janë rritur me rreth 120 për qind që nga fillimi i vitit, ndërsa rezervat e ulëta në depo dhe rreziku i ndërprerjeve të furnizimit mund të shtojnë presionin mbi tregun para dimrit.
Një valë e re e të nxehtit dhe temperaturat e larta kanë rritur kërkesën për energji elektrike. Prodhimi më i ulët nga centralet bërthamore dhe hidrocentralet është kompensuar pjesërisht nga termocentralet me gaz, në një periudhë kur vendet evropiane duhet të rrisin rezervat për sezonin e dimrit.
Çmimi referent i gazit në tregun holandez TTF është rritur me rreth 120 për qind që nga janari, duke arritur në 63,7 euro për megavat-orë më 18 gusht.
Megjithëse ky nivel është ende dukshëm më i ulët se rekordi prej 350 euro për MWh në vitin 2022, gjatë krizës energjetike pas pushtimit rus të Ukrainës, rezervat evropiane mbeten nën nivelet e zakonshme për këtë periudhë.
Në fillim të gushtit, depot e gazit ishin të mbushura rreth 57 për qind, niveli më i ulët për këtë periudhë të vitit. Sipas rregullave të BE-së, rezervat duhet të arrijnë të paktën 90 për qind të kapacitetit deri në periudhën 1 tetor–1 dhjetor, me mundësi për devijime në kushte të vështira të tregut.
Në krahasim me vitin 2021, konsumi i gazit në Evropë është ulur me rreth 15 deri në 20 për qind.
