LSDM ka kërkuar tërheqjen e Projektligjit për Zbatimin e Projektit “Shkupi – Kryeqyteti Evropian i Kulturës 2028”, duke shprehur shqetësime lidhur me mënyrën e parashikuar për menaxhimin e fondeve publike.
Në një konferencë për media, deputetja e LSDM-së, Bisera Kostadinovska Stojçevska, tha se edhe pse projektligji u hoq nga rendi i ditës i seancës së sotme të Kuvendit, ai mbetet në procedurë parlamentare dhe mund të rikthehet për shqyrtim në një nga seancat e ardhshme.
Sipas saj, pas marrjes së titullit “Shkupi – Kryeqyteti Evropian i Kulturës” në shtator të vitit 2023, ishte krijuar një mekanizëm për menaxhimin e projektit, ndërsa pas ndryshimit të qeverisë në vitin 2024, procesi, sipas saj, u ndërpre.
Kostadinovska Stojçevska deklaroi se projektligji parashikon themelimin e një fondacioni që do të realizojë projektin dhe shprehu shqetësimin se kjo, sipas vlerësimit të LSDM-së, mund të mundësojë shpenzimin e rreth 21 milionë eurove pa zbatimin e procedurave të Ligjit për Prokurimin Publik.
Ajo theksoi se LSDM dhe partnerët e koalicionit kërkojnë tërheqjen e projektligjit, duke vlerësuar se ai nuk garanton transparencë të mjaftueshme në menaxhimin e mjeteve publike. Sipas saj, çdo shpenzim i fondeve publike duhet të realizohet në përputhje me Ligjin për Prokurimin Publik.
