Gjithsej 42 shtete dhe territore, përfshirë edhe Maqedoninë e Veriut, janë përfshirë nga Greqia në listën e vendeve që konsiderohen se kanë një “regjim tatimor të privilegjuar” për vitin tatimor 2024.
Bëhet fjalë për shtete ku personat juridikë i nënshtrohen një norme tatimore më të ulët se ajo që do të zbatohej nëse do të ishin rezidentë tatimorë ose do të ushtronin aktivitet të përhershëm biznesi në Greqi.
Vendimi ministror për përcaktimin e shteteve me “regjim tatimor të privilegjuar”, në bazë të dispozitave të Ligjit 4172/2013, është publikuar në Gazetën Zyrtare të Greqisë. Dokumenti është nënshkruar nga ministri dhe zëvendësministri i Ekonomisë Kombëtare dhe Financave, Kirjakos Pierakakis dhe Dimitris Markopulos.
Sipas vendimit, në këtë kategori përfshihen shtetet ku norma e tatimit mbi fitimin, të ardhurat ose kapitalin e personave juridikë është e barabartë ose më e ulët se 60 për qind e normës tatimore që do të zbatohej sipas legjislacionit grek.
Në listën për vitin tatimor 2024 janë përfshirë gjithsej 42 shtete dhe territore.
Përveç Maqedonisë së Veriut, nga vendet evropiane në listë janë edhe Shqipëria, Andorra, Bullgaria, Qiproja, Kosova, Bosnjë e Hercegovina, Mali i Zi, Monako, Hungaria, Irlanda, Lihtenshtajni dhe Moldavia.
