Shkup, 3 shtator, Zhurnal.mk – Ministria e Arsimit dhe Shkencës dhe Qyteti i Shkupit së shpejti do të prezantojnë një set të ri masash të destinuara për uljen dhe parandalimin e dhunës mes bashkëmoshatarëve tek fëmijët dhe nxënësit, njoftoi sot kryetari i Shkupit, Orce Gjorgjievski.
Duke iu përgjigjur një pyetjeje të gazetarëve me rastin e incidentit të fundit në Shkup, ku një djalë 13‑vjeçar u godit me thikë dhe po lufton për jetën, Gjorgjievski theksoi se tashmë po përgatitet një strategji e forcuar.
“Po përgatisim edhe një set më të madh masash së bashku në bashkëpunim me ministren e arsimit, Janevska, me të cilën kemi bashkëpunim të shkëlqyer, por edhe mbështetje të fortë, të fortë në atë pjesë, kështu që në periudhën e ardhshme do të dalim me një set të plotë masash dhe do të jeni dëshmitarë të asaj që do ta fillojmë si proces, e që do të ndikojë. Jam i bindur, në afat të gjatë, që të kemi sa më pak raste të tilla”, deklaroi Gjorgjievski.
Ai shtoi se në përgatitjen e platformës janë të përfshira ekipe ekspertësh që do të punojnë me nxënësit, por edhe me prindërit e tyre.
“Ndonjëherë faji, do të thosha, është tek një pjesë e fëmijëve, por shumë më shpesh faji është tek prindërit, të cilët për fat të keq në atë mënyrë lejojnë që fëmijët të sillen. Por, do të japim gjithçka nga vetja për të ndihmuar në atë proces. E dini që unë si kryetar i Qytetit të Shkupit një nga ato gjëra që e kam bërë në periudhën e kaluar është që të mos ketë telefona të pranishëm në mësim në shkollat e mesme”, theksoi Gjorgjievski. përcjell Zhurnal.mk .
