Deputetja e VMRO-DPMNE-së, Bojkovska, ka deklaruar se pagat dhe pensionet në Maqedoninë e Veriut janë rritur me ritëm më të shpejtë gjatë qeverisjes së kësaj partie, duke iu referuar të dhënave për periudhën 2017–2026.
Sipas saj, në qershor të vitit 2017, paga mesatare ishte 22.800 denarë, ndërsa në maj të vitit 2024 arriti në 41.250 denarë. Bojkovska thotë se gjatë kësaj periudhe prej shtatë vitesh, paga mesatare u rrit për rreth 18.400 denarë.
Ndërsa, sipas të dhënave që ajo prezantoi, në korrik të vitit 2024 paga mesatare ishte rreth 40.900 denarë, kurse në maj të vitit 2026 arriti në mbi 49.500 denarë. Kjo paraqet një rritje prej rreth 8.600 denarësh në 23 muaj, ose një rritje mesatare mujore prej më shumë se 370 denarësh.
Bojkovska u ndal edhe te pensionet. Ajo tha se pensioni mesatar i pleqërisë në qershor të vitit 2017 ishte nën 15.300 denarë, ndërsa në maj të vitit 2024 arriti në mbi 22.900 denarë.
Sipas saj, në korrik të vitit 2024 pensioni mesatar i pleqërisë ishte 22.850 denarë, ndërsa në maj të vitit 2026 arriti në mbi 29.700 denarë, që paraqet rritje prej më shumë se 6.800 denarësh në 23 muaj.
Bojkovska vlerësoi se këto të dhëna tregojnë, sipas saj, një rritje më të shpejtë të pagave dhe pensioneve gjatë periudhës së qeverisjes së VMRO-DPMNE-së, krahasuar me periudhën e mëparshme.
Ajo tha se qëllimi i Qeverisë është rritja e pagave dhe pensioneve, tërheqja e investimeve, krijimi i vendeve të reja të punës dhe përmirësimi i standardit të jetesës së qytetarëve.
