Struga dhe rrënjët e mia shqiptare janë një pjesë e rëndësishme e asaj që jam. Edhe pse jetën time e kam ndërtuar në Suedi, prejardhjen, gjuhën dhe lidhjen me vendin tim i kam mbajtur gjithmonë pranë zemrës.
Kur shikoj rrugëtimin tim, ndiej para së gjithash mirënjohje dhe krenari. Suedia më dha mundësinë të rritem, të arsimohem, të krijoj familje dhe të ndërtoj jetën time. Sot kam privilegjin që edhe vetë të kontribuoj dhe të marr përgjegjësi për zhvillimin e shoqërisë ku jetoj.
Prej më shumë se 14 vitesh jam aktive në politikën komunale në Växjö. Sot jam kryetare e dy komisioneve komunale, udhëheqëse e grupit të Socialdemokratëve në këshillin komunal dhe mbaj edhe detyra të tjera politike. Në zgjedhjet e 13 shtatorit kandidoj në tri nivele: për Komunën e Växjö-s, Rajonin Kronoberg dhe Parlamentin e Suedisë.
Por për mua politika nuk është titull apo pozitë. Është përgjegjësi.
Unë dua të përfaqësoj një shoqëri ku fëmijët kanë mundësi të mira pavarësisht se në cilën familje lindin, ku të moshuarit ndihen të sigurt, ku kemi shkolla dhe kujdes shëndetësor të fortë dhe ku puna dhe përpjekja e njerëzve vlerësohen. Një shoqëri ku emri, prejardhja apo vendi ku ke lindur nuk përcakton se sa larg mund të arrish.
Pikërisht për këtë, rrugëtimi im ka një domethënie të veçantë për mua.
Jam shqiptare nga prejardhja dhe suedeze në vendin ku kam ndërtuar jetën time. Nuk kam pasur kurrë nevojë të zgjedh mes këtyre dy pjesëve të identitetit tim. I mbaj të dyja me krenari.
Dhe kur sot kërkoj besimin e qytetarëve suedezë për të vazhduar të marr përgjegjësi politike, e bëj këtë duke mos harruar asnjëherë nga vij.
Për mua është një krenari e veçantë që këtë rrugëtim mund ta ndaj edhe me shqiptarët e Strugës. ❤️
Arijeta Reci
Kandidate e Socialdemokratëve në zgjedhjet e 13 shtatorit 2026
Komuna Växjö – nr. 7
Rajoni Kronoberg – nr. 7
Parlamenti suedez – nr. 21
