Lokacioni potencial për ndërtimin e Qendrës Kombëtare të të Dhënave tashmë është përzgjedhur dhe ndodhet pranë Zonave Zhvillimore Teknologjike-Industriale Shkup 1 dhe 2.
Ministri i Transformimit Digjital, Stefan Andonovski, thotë se lokacioni është i përshtatshëm për shkak të afërsisë me Shkupin, autostradën dhe infrastrukturën optike. Parcela nuk ka tokë pjellore dhe ka hapësirë të mjaftueshme që në të ardhmen të ndërtohet edhe një central fotovoltaik, i cili do të furnizonte qendrën e të dhënave me energji elektrike.
Ndërtimi do të kushtojë 20 milionë euro, prej të cilave 70 për qind do të shkojnë për ndërtimin e objektit, ndërsa 30 për qind për pajisjet. Projekti do të financohet me mjete shtetërore, ndërsa 30 për qind do të jetë komponent grant. Qeveria aktualisht po zhvillon bisedime me institucione financiare ndërkombëtare për sigurimin e financimit.
Sipas Andonovskit, nga fillimi i ndërtimit deri në vënien në përdorim të qendrës do të nevojiten rreth dy deri në dy vjet e gjysmë.
Për shkak të rritjes së ndjeshme të çmimeve të pajisjeve harduerike, projekti do të jetë modular, duke mundësuar zgjerimin dhe përmirësimin e tij në të ardhmen. Blerja e pajisjeve është planifikuar për periudhën 2027–2028.
Aktualisht, Maqedonia disponon vetëm një qendër rezervë të të dhënave në Prilep, e cila është nën kompetencën e Ministrisë së Punëve të Brendshme. Pas ndërtimit të Qendrës Kombëtare të të Dhënave, parashikohet migrimi gradual i të dhënave nga institucionet shtetërore.
Qëllimi është krijimi i një infrastrukture më të sigurt dhe rritja e nivelit të sigurisë kibernetike të institucioneve, të cilat gjatë periudhës së kaluar në disa raste kanë qenë cak i sulmeve kibernetike.
