Kryetari i Lidhjes Demokratike të Kosovës (LDK), Lumir Abdixhiku, ka deklaruar se takimi me kryeministrin në detyrë dhe liderin e Lëvizjes Vetëvendosje, Albin Kurti, është zhvilluar në frymë pozitive, ndërsa ka bërë të ditur se bisedimet mes palëve do të vazhdojnë edhe në ditët e ardhshme.
Abdixhiku tha se LDK-ja mori pjesë në takimin e dytë pas zgjedhjeve të 7 qershorit me qëllim që të kontribuojë në gjetjen e një zgjidhjeje dhe të shmangen zgjedhjet e reja.
Sipas tij, gjatë takimit janë diskutuar çështje që lidhen me programet politike, ndryshimet e mundshme dhe orientimet strategjike për të ardhmen.
“Ky ishte një takim i mirë dhe konstruktiv. Do të përpiqemi që edhe në ditët në vijim të kemi diskutime më të thelluara”, deklaroi Abdixhiku.
Ai shtoi se LDK-ja do të vazhdojë angazhimin duke respektuar rezultatin zgjedhor dhe interesin institucional të vendit.
