Ministri i Jashtëm i Maqedonisë së Veriut, Timço Mucunski, dhe homologia e tij bullgare, Velislava Petrova-Çamova, pritet të takohen sot në Sofje “E enjte – 8 tetor 2026), në kuadër të një konference ndërkombëtare ministrore kushtuar Korridorit 8, përcjell “DW”.
Kryeministri Hristijan Mickoski tha se nga Sofja ka mbërritur një konfirmim se do të zhvillohet një takim zyrtar.
“Do të shohim se në çfarë formati dhe si do të duket, nëse do të jetë një ‘takim i shkurtër’ apo dypalësh, do të shohim se si do ta organizojë pritësi. Mesazhet tona janë të qarta se vetëm përmes dialogut mund të gjejmë një zgjidhje për këtë situatë në të cilën ndodhemi aktualisht, se jemi në favor të marrëdhënieve të fqinjësisë së mirë dhe duam ta realizojmë qëllimin tonë strategjik sa më shpejt të jetë e mundur, të jemi pjesë e Bashkimit Evropian, diçka që e kemi merituar prej kohësh”, tha Mickoski.
Iniciativa për takimin erdhi nga pala e Maqedonisë, pas këshillës së Presidentes së Komisionit Evropian, Ursula von der Leyen, gjatë vizitës së saj në Shkup.
Kryeministri Hristijan Mickoski më 6 tetor tha se nuk priste ndonjë rezultat konkret apo përparim të konsiderueshëm nga takimi. Ai e përshkroi bisedën e ardhshme si një dialog joformal “mbi kalë”, duke aluduar se sjellja e Sofjes zyrtare nuk lë vend për pritje të larta.
