Sofje, 5 tetor Zhurnal.mk – Ministrat e Punëve të Jashtme të Maqedonisë së Veriut dhe Bullgarisë, Timço Mucunski dhe Velislava Petrova, do të takohen të enjten në Sofje.
Nga Ministria e Jashtme bullgare kanë konfirmuar për Agjencinë Bullgare të Lajmeve (BTA) se shefat e diplomacive të të dyja vendeve do të kenë mundësinë të takohen në margjinat e konferencës ndërkombëtare ministrore për Korridorin 8, e cila do të mbahet në Sofje dhe do të organizohet nga ministrja Velislava Petrova.
“Forumi, ku do të marrë pjesë edhe ministri i Punëve të Jashtme të Republikës së Maqedonisë së Veriut, Timço Mucunski, do të mundësojë zhvillimin e një takimi dypalësh, si pjesë e dialogut të vazhdueshëm ndërmjet dy vendeve”, bëjnë të ditur nga Ministria e Jashtme e Bullgarisë.
Nisma për takimin e ministrave të Jashtëm të të dyja vendeve erdhi gjatë vizitës së presidentes së Komisionit Evropian, Ursula von der Leyen, në Shkup. Me këshillën e saj, kryeministri Hristijan Mickoski i kërkoi Mucunskit të kërkojë takim me Petrovan, në përpjekje për të nxitur procesin e zgjidhjes së çështjes së bllokadës bullgare ndaj integrimit evropian të Maqedonisë së Veriut.
Nga Ministria e Punëve të Jashtme dhe Tregtisë së Jashtme e Maqedonisë së Veriut më herët kanë konfirmuar për agjencinë MIA se është kërkuar takim ndërmjet ministrit Timço Mucunski dhe ministres së Jashtme të Bullgarisë, Velislava Petrova-Çamova.
Takimi pritet të zhvillohet gjatë kësaj jave, në margjinat e takimit ministror në Sofje, kushtuar Korridorit 8. përcjell Zhurnal.mk .
