Më 27 shtator në Vjenë do të mbahet konferenca ministrore mes vendeve të Ballkanit Perëndimor dhe Austrisë, Çekisë e Sllovakisë, ku do të diskutohet për përparimin drejt Bashkimit Evropian.
Ambasadori austriak në Maqedoninë e Veriut, Martin Pammer, tha se ekziston interes i shtuar për procesin e zgjerimit dhe theksoi rëndësinë e vazhdimit të reformave.
Pammer deklaroi se Maqedonia e Veriut ka bërë përparim në kuadër të Planit të Rritjes dhe se vendit do t’i ndahen 140 milionë euro për aktivitetet e mëtejshme reformuese.
Në takim u theksua edhe mbështetja e Austrisë, Çekisë dhe Sllovakisë për integrimin evropian të Ballkanit Perëndimor, ndërsa u përmendën edhe projekte konkrete në Maqedoninë e Veriut, përfshirë zhvillimin e turizmit malor dhe ndërtimin e shtigjeve në Vodno, Sharri dhe Pelister.
Zëvendësambasadorja çeke Andrea Štajner Votavova tha se mbështetja për integrimin evropian të rajonit mbetet një nga prioritetet kryesore të formatit “Sllavkov 3”.
