Ish-presidenti bullgar Rumen Radev, i cili tani është futur në garë për të formuar një qeveri bullgare me lëvizjen e tij, deklaroi në një intervistë për gazetën gjermane Berliner Zeitung, të cilën e raporton Deutsche Welle , se sipas konsensusit evropian të korrikut 2022, Maqedonia e Veriut duhet të ndryshojë Kushtetutën dhe t’i përfshijë bullgarët në mënyrë të barabartë me komunitetet e tjera në preambulën e Kushtetutës, dhe se vetëm pas kësaj mund të fillojnë negociatat për anëtarësimin e vendit në Bashkimin Evropian.
Deklarata e Radevit vjen pasi kryeministri Hristijan Mickoski zbuloi informacion se Brukseli gjoja po diskuton pranimin e Maqedonisë në Bashkimin Evropian që vitin e ardhshëm, por si një anëtare që nuk do të ketë të drejtë vote, gjë që do të shmangte një veto nga Sofja.
“Ky është një proces i vështirë, por i domosdoshëm dhe ne do të donim ta shihnim RSM-në në BE sa më shpejt të jetë e mundur. Ne nuk duam kufij dhe pika kontrolli kufitare, por duam që njerëzit në të dyja anët e kufirit të jenë në gjendje të jetojnë, të punojnë dhe të komunikojnë së bashku lirisht”, tha Radev.
Ai gjithashtu shprehu kundërshtime ndaj propozimit që Ukraina të fitojë anëtarësim të përshpejtuar në BE – një proces nga i cili Maqedonia do të përfitonte aktualisht dhe do të anashkalonte bllokadën bullgare. Nxitimi, tha ai, rrezikon të minojë parimet evropiane dhe Ukraina ka ende shumë punë për të bërë për të përmbushur kriteret e nevojshme për anëtarësim në BE.
Sipas sondazheve të fundit përpara zgjedhjeve të reja të parakohshme parlamentare në Bullgari, të cilat do të mbahen këtë vit, koalicioni i Radevit është tani forca kryesore politike në Bullgari, me besimin e 33 përqind të votuesve të anketuar.
