VMRO-DPMNE ka reaguar ndaj deklaratës së liderit të LSDM-së, Venko Filipçe, se “Maqedonia nuk është në shitje”, duke e kritikuar ashpër për qëndrimet e tij gjatë kohës kur ishte ministër në qeverinë e udhëhequr nga Zoran Zaev.
Nga partia në pushtet pretendojnë se Filipçe, si pjesë e qeverisë së atëhershme, kishte mbështetur politikat e Zaevit, përfshirë Marrëveshjen e Prespës dhe ndryshimin e emrit të shtetit.
VMRO-DPMNE e akuzon Filipçen se në atë periudhë nuk kishte reaguar ndaj, siç shprehen ata, “ultimatumeve nga Bullgaria” dhe politikave që sipas tyre kanë dëmtuar interesat shtetërore.
Në reagim përmenden gjithashtu pretendime për tenderë, furnizime me vaksina dhe përfitime personale që partia ia atribuon Filipçes dhe Zaevit. VMRO-DPMNE pretendon se këto politika u kanë sjellë përfitime personale, ndërsa qytetarët janë përballur me pasoja ekonomike.
Partia kritikon gjithashtu qëndrimin e LSDM-së ndaj investimeve dhe projekteve të reja në vend, duke pretenduar se opozita po kundërshton zhvillimin e industrisë, investimet në teknologji dhe zhvillimin e sektorit minerar.
Në fund të reagimit, VMRO-DPMNE thotë se qytetarët e kanë njohur tashmë politikën e LSDM-së dhe se kjo parti do të mbetet në opozitë.
Pretendimet e bëra në reagim janë qëndrime politike të VMRO-DPMNE-së.
