25.8 C
Skopje
Tuesday, June 18, 2024

VMRO-DPMNE-ja pret që deri me 28 maj të formohet Kuvendi, qeveria deri në mes të qershorit

Përbërja e re e Kuvendit të Maqedonisë së Veriut pritet të konstituohet deri më 28 maj, ndërsa Qeveria e re pritet të formohet deri në mes të qershorit. Kështu kanë paralajmëruar sot nga VMRO-DPMNE, transmeton Portalb.mk.

Sekretari i përgjithshëm i VMRO-DPMNE-së, Gjorgjia Stajkoski pasi sot Komisioni Shtetëror i Zgjedhjeve bëri ndarjen e certifikatave për deputetë për mandatet e vërtetuara parlamentare, foli për përbërjen e re parlamentare dhe qeverinë.

“Me marrjen e certifikatave presim që deri më 28 maj të formohet Kuvendi i Republikës së Maqedonisë, ndërsa deri në mes të qershorit presim që të kemi Qeverinë e re në Republikën e Maqedonisë”, tha Stajoski.

Në ndërkohë, VMRO-DPMNE dhe VLEN tani më kanë formuar grupet e punës dhe vijojnë bisedimet për formimin e Qeverisë.

Ndërkaq, sot anëtari i Komitetit Ekzekutiv të VMRO-DPMNE-së, Antonio Milloshoski ka deklaruar se kur të përfundojnë negociatat me “Vlenin”, do të hapet mundësia për bisedime me Lëvizjen ZNAM të Maksim Dimitrievskit.

Milloshoski e tha këtë kur u pyet për deklaratat e liderit të partisë Hristijan Mickoskit se kanë 61 deputetë, ndërsa me rivotimin e nesërm në shtatë vendvotime në zonën e pestë dhe të gjashtë, VMRO-DPMNE pret të ketë 62 mandate në Kuvend.

Nesër (22 maj) do të votohet në shtatë vendvotime në njësitë zgjedhore 5 dhe 6. Kjo për shkak se Komisioni Shtetëror i Zgjedhjeve e ka anuluar votimin në këto vendvotime, ndërsa vendimin e ka konfirmuar edhe Gjykata Administrative.

Rivotim do të bëhet në vendvotimet 2101 në Zhelinë, 1194 dhe 1202 në Krushevë, 1272 në Ohër, 1470 dhe 1470/1 në Dollnen, si dhe në 1844 në Strugë.

Sot votojnë personat e sëmurë dhe të pafuqishëm, të burgosurit si dhe personat e vendosur në shtëpi jashtëfamiljare. Të drejtë vote në këto qendra votimi kanë gjithsej 4.521 votues.

Zgjedhjet e njëmbëdhjeta parlamentare në RMV u mbajtën me 8 maj 2024. Sipas rezultateve, VMRO-DPMNE fitoi 58 deputetë, Fronti Evropian 19, LSDM 18, VLEN 13, E Majta 6 dhe Znam 6. Përbërja e re e Kuvendit duhet të konstituohet më së voni 20 ditë pas zgjedhjeve.

Lajme të ngjajshme

PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu

EVN

Lajmet e fundit