Shkup, 4 gusht, Zhurnal.mk – Për shkak të temperaturave të larta është rritur numri i thirrjeve drejt Ndihmës Mjekësore të Shpejtë (NMSh). Në ditë ka mbi 200 thirrje, kryesisht për intervenime në hapësira publike ku qytetarët kolapsojnë, si dhe për përkeqësim të gjendjes shëndetësore te persona në kushte shtëpie.
Këtë për MIA e deklaroi Daniel Georgievski nga Ndihma Mjekësore e Shpejtë, i cili theksoi se numri i intervenimeve të lidhura me motin e nxehtë është rritur krahasuar me periudhat e tjera të vitit.
„Mesatarisht, intervenimet e NMSh‑së të lidhura me kolapset janë ndërmjet tre dhe pesë në ditë, por në disa ditë numri është edhe më i lartë. Ka më shumë thirrje nga qytetarë me simptoma si marramendje, të vjella, mbinxehje të trupit dhe goditje nga të nxehtit, dhe shumë shpesh arrijmë të ndihmojmë edhe me këshilla“, deklaroi Georgievski për MIA.
Ai paralajmëron se temperaturat e larta ndikojnë veçanërisht te personat me sëmundje kronike, te të cilët mund të vijë deri te përkeqësimi i gjendjes kardiologjike, paraqitja e goditjeve në zemër dhe tru, si dhe ndryshime në tensionin e gjakut.
Nga Ndihma Mjekësore e Shpejtë rekomandojnë shmangien e ekspozimit të drejtpërdrejtë në diell në periudhën 11:00–17:00, marrjen e mjaftueshme të lëngjeve, sidomos ujë, shmangien e alkoolit dhe veshjen e rrobave të lehta dhe mbrojtje për kokën gjatë daljes jashtë.
Qytetarët që pas qëndrimit të zgjatur në diell ndjejnë marramendje, të vjella ose dobësi, duhet menjëherë të strehohen në një hapësirë të freskuar dhe të marrin më shumë lëngje.
Georgievski këshillon gjithashtu konsumimin e ushqimit të lehtë, marrjen e rregullt të terapisë te personat me sëmundje kronike, matjen e tensionit të gjakut, ndërsa te diabetikët edhe kontroll të rregullt të nivelit të sheqerit në gjak. përcjell Zhurnal.mk .
