Punëdhënësit në Maqedoninë e Veriut po kërkojnë gjithnjë e më shumë fuqi punëtore nga jashtë vendit, ndërsa punëtorët nga Bangladeshi kryesojnë listën.
Sipas të dhënave të Agjencisë së Punësimit, nga 1 janari deri më 19 gusht 2026 janë lëshuar 1.837 opinione për punëtorë nga Bangladeshi. Pas tyre renditen shtetasit e Turqisë me 1.257 opinione, Nepali me 787, India me 323 dhe Pakistani me 46.
Agjencia e Punësimit sqaron se, në përputhje me kompetencat ligjore, kontrollon plotësimin e kushteve për punësimin e shtetasve të huaj, përfshirë kuotat dhe gjendjen në tregun e punës. Më pas, opinioni i dërgohet Ministrisë së Punëve të Brendshme në kuadër të procedurës për rregullimin e qëndrimit të të huajve në bazë të punësimit.
Për shtetasit e huaj që kanë rregulluar qëndrimin mbi baza të tjera, Agjencia është përgjegjëse për lëshimin e lejeve të punës. Gjatë kësaj periudhe janë lëshuar 47 leje pune për shtetas turq, tri për nepalezë dhe katër për shtetas indianë.
Kërkesa për punëtorë të huaj është veçanërisht e lartë në sektorin e ndërtimit, industrinë përpunuese, akomodimin dhe shërbimet ushqimore, si dhe në tregtinë me shumicë dhe pakicë.
