Dhjetë ditë para fillimit të vitit të ri shkollor, familjet po përballen me shpenzime të shtuara për blerjen e çantave, fletoreve, mjeteve shkollore, veshmbathjeve dhe pajisjeve të tjera të nevojshme për nxënësit.
Fillimi i vitit shkollor tradicionalisht sjell një barrë shtesë për buxhetin familjar, ndërsa rritja e kostos së jetesës e bën edhe më të vështirë sigurimin e të gjitha pajisjeve të nevojshme për fëmijët.
Për këtë arsye, Qeveria po përgatit masa përmes të ashtuquajturës “shportë shkollore”, me qëllim uljen e shpenzimeve në prag të fillimit të mësimit. Megjithatë, ende nuk janë bërë të ditura të gjitha detajet, përfshirë produktet që do të përfshihen dhe masën e uljes së çmimeve.
Shpenzimet për familjet nuk kufizohen vetëm në blerjen e pajisjeve shkollore. Gjatë vitit, ato përballen edhe me kosto për transport, aktivitete shkollore dhe nevoja të tjera që lidhen me arsimimin e fëmijëve.
Sipas të dhënave të Federatës së Sindikatave të Maqedonisë, në gusht shpenzimet për arsimin brenda shportës minimale të konsumit kanë kaluar 7.000 denarë.
Me afrimin e 1 shtatorit, mbetet të shihet se në çfarë mase “shporta shkollore” do të ndikojë në uljen e shpenzimeve dhe sa do të jetë lehtësimi konkret për familjet me nxënës.
