18.8 C
Skopje
Tuesday, May 28, 2024

Ndahet nga jeta luftëtari i Betejës së Koshares, tropojani Avdyl Treshnjeva

Është ndarë nga jeta në moshën 65-vjeçare luftëtari i betejës së Koshares, Avdyl Treshnjeva. Ai u nda nga jeta pak ditë më parë në Francë dhe është dërguar së fundmi për në banesën e fundit në fshatin Astë të Tropojës.

Treshnjeva ishte luftëtar i UÇK-së dhe pjesëmarrës në Betejën e Koshares bashkë me heroin Agim Ramadani.

Avdyli lindi në një familje atdhetare e me tradita të shkëlqyera. Ai u rrit në mjedisin familjar me ndjenjat e pastra e të fuqishme të atdhedashurisë, bujarisë, trimërisë e të guximit, me përkushtimin e gatishmërinë për t’i shërbyer Çështjes Kombëtare në çdo kohë e, në të gjitha rrethanat, sado të vështira që mund të ishin ato.

Ky formim i shëndoshë moral, bëri që Avdyli, me të filluar Lufta Çlirimtare e Kosovës, kundër pushtuesit serb, pa më të voglin hezitim, qysh në marsin e vitit 1998, t’i bashkohej asaj lufte dhe formacionit të UÇK.

Avdyl Treshnjeva mori pjesë si ushtar i UÇK, në Rrafshin e Dukagjinit (Kosovë) në pothuajse të gjitha luftimet e betejat e zhvilluara kundër pushtuesit, në atë zone, duke u dalluar për guximin e trimërinë e tij në fushëbetejë, por edhe duke i frymëzuar edhe bashkëluftëtarët e tij.

Është frymëzues dhe i paharruar vendimi dhe akti i tij tepër i guximshëm, siç ishte ai për minimin e mjeteve luftarake lëvizëse të blinduara,“pizgaverët” e ushtrisë serbe, në Qafë të Morinës.

Avdyli u shqua në të gjitha luftimet që zhvilloi “Brigada 138”, ku edhe bëri pjesë ai, duke mos iu ndarë asaj deri në Betejën e Koshares, betejë në të cilën bie heroikisht edhe komandanti i saj Heroi Agim Ramadani.

Me përfundimin e Luftës së UÇK-së Avdyli aktivizohet në TMK, deri në fundin e vitit 2000, kohë kur një sëmundje e rëndë e shkëput fizikisht nga ai formacion mbrojtës i Kosovës, por jo shpirtërisht. I detyruar nga sëmundja, ai emigron në Francë, ku edhe mjekohet, por edhe jeton deri sa vdiq.

Me vdekjen e këtij atdhetari e luftëtari të lirisë, Tropoja, Krahina e tij e shtrenjtë, Shipshani, humbën një bir e burrë që u rreshtua tek nderi e tek lavdia e Tropojës dhe e shqiptarisë.

Me këtë rast iu shpreh ngushëllimet familjes, vëllezërve, të afërmve, miqve dhe bashkëluftëtarëve të Avdyl Treshnjevës.

Lajme të ngjajshme

PËRGJIGJU

Ju lutemi shkruani komentin tuaj!
Ju lutem shkruani emrin tuaj këtu

EVN

Lajmet e fundit