Minatori kosovar Emin Hasani ndihet më afër Zotit kur bën iftarin e Ramazanit 800 metra (2625 këmbë) nën tokë, shkruan Reuters, përcjell agjencia e lajmeve INA.
Pas një ndërrimi të gjatë dhe të mbytur në minierën e Trepçës në Stanberg në Veri të Kosovës, Hasani kontrollon orën për të ditur se kur po perëndon dielli në sipërfaqe dhe nëse ka ardhur koha për të ngrënë.
I ulur rreth një tavoline të vogël në një zyrë të improvizuar në minierë, ai dhe katër kolegë nxjerrin hurma, kos, turshi dhe djathë që i shoqërojnë me çaj të zi me sheqer.
Burrat qeshin dhe bisedojnë me njëri-tjetrin ndërsa ndajnë vaktin e Iftarit, të ngrënë pas një dite agjërimi midis lindjes së diellit dhe perëndimit të diellit gjatë muajit të shenjtë mysliman të Ramazanit.
“Unë jam gjithmonë i lidhur me Allahun, në kohë si tani ku jemi 800 metra nën tokë”, tha Hasani para se të lexonte lutjet e tij. “Sa më thellë të shkoj, aq më shumë ndihem afër Allahut.”
Kosova është një vend me shumicë myslimane dhe qindra minatorë në minierën shtetërore të plumbit, zinkut dhe argjendit po kremtojnë Ramazanin, ndonjëherë duke duruar temperaturat afër 40 gradë Celsius dhe lagështinë ekstreme.
Nga Fatos Bytyçi/Reuters
