Ish-kryeministri Nikolla Gruevski, i cili është në arrati në Hungari, ende ka azil dhe për këtë arsye nuk është dërguar asnjë kërkesë e re për ekstradim, thotë kryeministri Hristijan Mickoski, pas akuzave nga LSDM-ja opozitare se qeveria po e zvarrit procedurën e ekstradimit. Lidhur me krahasimin me Poloninë, e cila tashmë ka kërkuar ekstradimin e ish-zyrtarëve të saj, Mickoski thotë se këto janë raste të ndryshme, transmeton Portalb.mk
“Ata nuk kanë azil – ish-anëtarët polakë të qeverisë. Në rastin tonë, ish-kryeministri ka azil. Për të dërguar kërkesë për ekstradim, së pari duhet të ndiqet një procedurë, për të hequr azilin. Kjo është gjëja e parë. Nëse e dërgojmë tani, do të marrim përgjigje negative. Mund ta dërgojmë nesër, pa problem, vetëm le t’i shohim gjërat në një mënyrë më substanciale. Ndërsa le të kërkojë edhe opozita që Vasko Kovaçevski të vijë”, tha Mickoski.
Lidhur me rastin e ekstradimit të mundshëm të Gruevskit, avokati nga Komiteti i Helsinkit i Hungarisë, Zholt Szekeres, tha në një intervistë për “360 Gradë” se statusi i refugjatit të një personi i nënshtrohet shqyrtimit çdo tre vjet. Një shqyrtim mund të iniciohet edhe në mënyrë të jashtëzakonshme, por në atë rast duhen disa muaj për të arritur në një vendim përfundimtar, pavarësisht politikave dhe njoftimeve të njeriut që pritet të bëhet kryeministri i ri i Hungarisë, Peter Magyar.
“Siç qëndrojnë gjërat, për aq sa kuptoj unë, Nikolla Gruevski aktualisht gëzon statusin e refugjatit në Hungari. Ky është informacioni më i fundit në lidhje me statusin e tij që është i disponueshëm publikisht për ne. Ata që njihen si refugjatë përballen me një shqyrtim periodik të statusit të tyre, i cili ndodh çdo tre vjet pasi njihen si refugjatë. Dhe, nëse plotësohen kushte të caktuara, statusi i azilit mund të tërhiqet edhe jashtë këtyre periudhave trevjeçare të shqyrtimit. Por kjo rregullohet qartë me ligj dhe duhet të përmbushen kritere të qarta që të përdoret. Natyrisht, asnjë autoritet nuk mund të veçojë marrësit e statusit të refugjatit individualisht me fjalën e një politikani – kjo do të ishte në kundërshtim me sundimin e ligjit. Ajo që duhet të ndodhë është që autoriteti kompetent në një rast të tillë, nëse beson se statusi i refugjatit të dikujt duhet të tërhiqet, duhet të kalojë nëpër një procedurë formale në të cilën vetë refugjatit, në këtë rast, duhet t’i jepet gjithashtu shans për të reaguar ndaj pretendimeve dhe qëndrimit të autoritetit se pse statusi duhet të tërhiqet. Dhe nëse tërhiqet, duhet të shpjegohet siç duhet në një vendim të veçantë që mund të kundërshtohet në gjykatë. Pra, ekziston një procedurë në të cilën mund të bëhet, është bërë në të kaluarën, është pjesë e ligjit, pjesë e ligjit të BE-së, por, sigurisht, garancitë ligjore dhe të drejtat procedurale duhet të respektohen”, thotë Sekeresh.
