Maqedonia e Veriut ka flotën më të vjetër të automjeteve në rajon, me një moshë mesatare prej 19,4 vjetësh, sipas një analize të “Al Jazeera Balkans”.
Edhe pse numri i automjeteve të regjistruara është pothuajse dyfishuar nga viti 2012 deri në vitin 2024, mosha mesatare e tyre ka mbetur pothuajse e njëjtë. Në vitin 2024, në vend ishin të regjistruara rreth 700 mijë automjete, krahasuar me 350 mijë në vitin 2012.
Shqetësues është fakti se 87,9 për qind e automjeteve janë më të vjetra se shtatë vjet. Mosha mesatare në vend është dukshëm më e lartë se ajo në Bashkimin Evropian, ku arrin në 12,7 vjet.
Në rajon, Kosova ka një moshë mesatare të automjeteve prej 18 vjetësh, Greqia 17,3 dhe Mali i Zi 17,06 vjet. Ndërkohë, në Kroaci mesatarja është 14,63 vjet, ndërsa në Slloveni 11,2 vjet.
Si një nga arsyet kryesore për këtë gjendje përmendet importi i madh i veturave të përdorura nga Evropa Perëndimore, veçanërisht nga Gjermania dhe Italia. Fuqia e kufizuar blerëse bën që shumë qytetarë të mos kenë mundësi të blejnë automjete të reja.
Disa vende të rajonit kanë vendosur kufizime për importin e automjeteve të vjetra, sidomos atyre me naftë. Në Bosnjë e Hercegovinë dhe Mal të Zi janë ndaluar disa kategori të këtyre automjeteve, ndërsa Serbia vazhdon të lejojë importin edhe të veturave më të vjetra se 20 vjet.
