I sigurtë është vetëm largimi i Jurgen Klopp, nga “Të Kuqtë” e Liverpullit, mirëpo pritet të mos jetë i vetmi, pasi edhe “Faraoni” egjiptian, Mohamed Salah duket se është në ditët e tij të fundit, në “Anfield Road”, me klubin që është duke menduar për alternativat e mundshme për të zëvendësuar një nga më të mirët e historisë së klubit.
Sipas raportimeve më të fundit, të tabloideve britanike, dy janë emrat më të pëlqyer nga bordi i “Të Kuqve” e të dy vijnë nga kampionati spanjoll i futbollit, La Liga e më konkretisht nga skuadra e Barcelona-s, nga ku në listën e objektivave janë anësorët Ansu Fati e Rafinja, të cilët në karrierën e tyre kanë luajtur edhe në Premier Ligw.
Fati është aktualisht i huazuar te Brajtoni, ku nuk është se ka bërë shumë keq, në elitën e futbollit anglez, duke shënuar 4 e asistuar një tjetër gol, në 26 paraqitjet e zhvilluara, ndërsa Rafinja ende nuk po bind drejtuesit “katalanas”, që prej transferimit të tij, nga Lidsi, pavarësisht se ka regjistruar 5 gola e 10 asistime, në 28 përballjet e derimëtanishme.
Megjithatë këto dy emra aludohet se nuk janë të vetmit në listën e Liverpullit, me bordin e këtyre të fundit, që më herët si objektiv të tyrin kanë patur edhe brazilianin Rodrigo, mirëpo çmimi i lartë prej 80 milionë eurosh, deri më tani i panegociueshëm nga “Galaktikët” e Real Madrid, pritet të jetë një pengesë e madhe.
