Gjermania po rihap debatin për një nga rregullat më të vjetra të vendit, atë të mbylljes së shumicës së dyqaneve të dielave, ndërsa ekonomia vazhdon të përballet me rritje të dobët, presion nga tarifat amerikane, konkurrenca kineze dhe shkurtimet e vendeve të punës në industri.
Sipas Die Zeit, në përpjekje për të nxitur konsumin e brendshëm, është rikthyer në diskutim mundësia e lehtësimit të kufizimeve për punën të dielave.
Në Gjermani, e diela gëzon mbrojtje kushtetuese që nga Kushtetuta e Vajmarit e vitit 1919. Rregullat për orarin e punës përcaktohen kryesisht nga landet federale, por në përgjithësi dyqanet duhet të qëndrojnë të mbyllura.
Aktualisht, përjashtim bëjnë vetëm dyqane të caktuara si pikat e karburantit, furrat e bukës (me orar të kufizuar), dyqanet në stacionet hekurudhore, aeroportet dhe spitalet.
Qeveria gjermane, për momentin, nuk planifikon liberalizim të plotë. Nga viti 2027 synon të lejojë orar më të gjatë pune të dielave vetëm për furrat e bukës, pastiçeritë dhe bibliotekat publike, ndërsa për sektorët e tjerë të tregtisë nuk parashikohen ndryshime.
Shoqata Gjermane e Tregtisë (HDE) e konsideron këtë të pamjaftueshme.
“Ekonomia është në gjendje të vështirë, ashtu si edhe besimi i konsumatorëve. A është vërtet koha e duhur t’u ndalojmë njerëzve që duan të punojnë?”, deklaroi drejtori i shoqatës, Stefan Genth.
Mbështetësit e ndryshimeve argumentojnë se rregullat aktuale janë shpesh kontradiktore. Në disa dyqane në Berlin, klientët mund të blejnë të dielave kastravec ose pije freskuese, por jo patate apo fasule të konservuara.
Këto dallime burojnë nga rregulloret e ndryshme të landeve federale dhe nga përjashtimet e shumta ligjore, të cilat bëjnë dallim mes ushqimeve bazë dhe jo bazë, si dhe mes produkteve të freskëta dhe atyre me afat të gjatë përdorimi.
Sipas mediave gjermane, pronari i një minimarketi në Berlin, Bedran Gunes, u gjobit së fundmi me 2,500 euro për shitjen e produkteve që nuk lejohen të dielave. Ai u mbrojt duke thënë se rreth 40 për qind e xhiros javore e realizon pikërisht të dielave dhe se, pa ato të ardhura, biznesi i tij do të falimentonte.
