Një moment emocional nga fushat e futbollit preku rajonin, pasi i riu David Dokmanoviq nga FK Eurosport ia kushtoi golin e tij Agan Asanit, futbollisti 13-vjeçar nga Çerkezi i Kumanovës që u nda nga jeta para tre ditësh.
Pas shënimit të golit, Dokmanoviq hoqi fanellën sportive dhe tregoi bluzën e poshtme, në të cilën ishte shkruar një dedikim për Aganin. Në bluzë qëndronte emri i Agan Asanit, vitet e jetës së tij tepër të shkurtër, 2013-2026, si dhe mesazhi: “Prehu në paqe”.
“Ia kushtova golin Agan Asanit”, tha i riu David Dokmanoviq.
Momentin prekës në rrjetet sociale e shpërndau Boshko Tasiq, i cili shkroi: “Edhe guri do të qante… Gol i kushtuar Agan Asanit, i cili ndërroi jetë para kohe”.
Fotografia shkaktoi reagime të forta dhe nuk la askënd indiferent. Ky gjest tregoi se sporti ndonjëherë sjell shumë më tepër se fitore dhe gëzim, ndërsa miqësia, kujtimet dhe respekti për Aganin vazhdojnë të jetojnë edhe jashtë fushës së futbollit.
