Kryetari i Komunës së Strugës, Mendi Qyra, realizoi një takim me Ambasadorin e Italisë në Republikën e Maqedonisë së Veriut, Paolo Palminteri.
Në takim u theksua rëndësia e Strugës si një nga pjesët më të bukura dhe më të njohura të vendit, si dhe lidhjet e afërta tradicionale me Italinë, duke pasur parasysh numrin e madh të qytetarëve nga Struga që jetojnë dhe veprojnë atje.
Ambasadori Palminteri shprehu përkushtimin e tij për zhvillimin e bashkëpunimit ekonomik dhe rritjen e investimeve italiane në Strugë, si dhe për avancimin e bashkëpunimit kulturor përmes iniciativave dhe programeve të ndryshme.
Një theks i veçantë iu kushtua mundësive për intensifikimin e shkëmbimeve kulturore, duke pasur parasysh bashkëpunimet e deritanishme me qytete të tjera në vend, si dhe potencialin që Struga të bëhet pjesë e këtyre iniciativave.
Kryetari Qyra dhe kabineti i tij i uruan mirëseardhje ambasadorit, duke theksuar se Komuna e Strugës mbetet e hapur për çdo lloj bashkëpunimi që kontribuon në zhvillimin ekonomik dhe kulturor të qytetit.
Përmes partneritetit dhe hapjes, Struga krijon mundësi të reja për zhvillim dhe bashkëpunim ndërkombëtar.
