Eleanor Roosevelt, diplomate, aktiviste dhe një nga figurat më të rëndësishme politike amerikane të shekullit XX, vdiq më 7 nëntor 1962, në moshën 78-vjeçare. Ajo njihet për angazhimin e saj në mbrojtjen e të drejtave të njeriut dhe për rolin e rëndësishëm në politikën amerikane dhe ndërkombëtare.
Roosevelt ishte Zonja e Parë e Shteteve të Bashkuara nga viti 1933 deri më 1945, gjatë katër mandateve presidenciale të bashkëshortit të saj, Franklin D. Roosevelt. Përmes angazhimit publik, udhëtimeve dhe aktiviteteve të saj, ajo ndryshoi ndjeshëm mënyrën se si shihej dhe ushtrohej ky rol, duke u bërë një zë i fuqishëm për të drejtat civile dhe barazinë gjinore.
Pas vdekjes së bashkëshortit, më 1945, ajo vazhdoi angazhimin në diplomaci, duke përfaqësuar Shtetet e Bashkuara në Organizatën e Kombeve të Bashkuara. Aty drejtoi Komisionin për të Drejtat e Njeriut dhe luajti rol kyç në hartimin e Deklaratës Universale të të Drejtave të Njeriut, e miratuar më 1948.
Për kontributin e saj në këtë fushë, presidenti amerikan Harry S. Truman e quajti “Zonja e Parë e Botës”. Eleanor Roosevelt mbetet një nga gratë më të vlerësuara në historinë amerikane, ndërsa angazhimi i saj për të drejtat e njeriut vazhdon të ketë rëndësi edhe sot./KultPlus.com
