Një gjykatë në lindjen e largët të Rusisë, qytetin Vladivostok, ka urdhëruar arrestimin e rreshterit të Shtabit të Shteteve të Bashkuara, Gordon Black dhe e dërgoi atë në paraburgim deri të paktën më 2 korrik, tha më 7 maj zëdhënësja e gjykatës, Elena Oleneva.
Black u akuzua për “vjedhje që i ka shkaktuar dëm të konsiderueshëm një qytetari”, raportoi Kommersant, duke cituar zëdhënësen e gjykatës. Dënimi maksimal për akuzën është pesë vjet burgim.
Mediat perëndimore kishin raportuar më herët se një ushtar amerikan ishte arrestuar në Rusi dhe se ishte akuzuar për vjedhje pasi kishte udhëtuar atje nga Koreja e Jugut, ku ishte i vendosur, pa informuar eprorët e tij, duke u shtuar në listën e amerikanëve të ndaluar nga Moska në mes të përkeqësimit të marrëdhënieve me Uashingtonin.
Zëdhënësja e Ushtrisë Amerikane, Cynthia Smith, konfirmoi në një deklaratë më 6 maj se ushtari, i cili nuk u identifikua, u ndalua katër ditë më parë në Vladivostok, një port ushtarak dhe tregtar në lindjen e largët të Rusisë.
Ajo tha se Rusia njoftoi Shtetet e Bashkuara dhe ushtria e njoftoi familjen e ushtarit.
Smith nuk dha detaje të tjera në deklaratë për shkak të “ndjeshmërisë së kësaj çështjeje”.
Ambasada e SHBA-së po kërkon qasje konsullore tek ai, raportoi CNN.
Ndalimi i ushtarit i shtohet listës së shtetasve amerikanë që mbahen në Rusi në rrethana të ndryshme dhe vjen pasi tensionet mes Moskës dhe Uashingtonit janë në nivelet më të larta që nga Lufta e Ftohtë.
Në mesin e atyre që po mbahen janë gazetarët Alsu Kurmasheva e Radios Evropa e Lirë dhe Evan Gershkovich i The Wall Street Journal, të cilët janë ndaluar me akuza që ata, punëdhënësit dhe mbështetësit e tyre i refuzojnë dhe i konsiderojnë si të motivuara politikisht.
Po ashtu, po mbahet edhe Paul Whelan, i cili në vitin 2020 u dënua me 16 vjet burg për akuzat e spiunazhit që ai dhe qeveria amerikane i kanë hedhur poshtë vazhdimisht.
Nuk ishte menjëherë e qartë nëse ushtari i arrestuar po konsiderohej si i munguar pa leje nga ushtria amerikane.
“Federata Ruse njoftoi Departamentin e Shtetit të SHBA-së për ndalimin penal në përputhje me Konventën e Vjenës për Marrëdhëniet Konsullore”, tha Smith në deklaratë.
“Ushtria njoftoi familjen e tij dhe Departamenti Amerikan i Shtetit po ofron mbështetjen e duhur konsullore për ushtarin në Rusi”, shtoi ajo.
Zyrtarët thanë se ushtari ishte i vendosur në Korenë e Jugut, ku ushtria amerikane ka rreth 28.500 trupa, dhe ishte në proces të kthimit në shtëpi në Fort Cavazos, Teksas, por në vend të kësaj udhëtoi për në Rusi.
“Jam thellësisht i shqetësuar nga raportet se një oficer i ushtrisë amerikane është arrestuar në Rusi. Putin ka një histori të gjatë të mbajtjes peng të qytetarëve amerikanë,” tha në një postim në X përfaqësuesi Michael McCaul, kryetar i Komitetit të Punëve të Jashtme të Dhomës së Përfaqësuesve.
Në shtator 2023 Departamenti i Shtetit lëshoi një paralajmërim “mos udhëto” për qytetarët amerikanë.
I pyetur për incidentin, një zëdhënës i Departamentit të Shtetit do të konfirmonte vetëm se “një shtetas amerikan është ndaluar në Rusi”.
“Ne përsërisim paralajmërimet tona të forta në lidhje me rrezikun që paraqitet për qytetarët amerikanë brenda Federatës Ruse. Qytetarët amerikanë që banojnë ose udhëtojnë në Rusi duhet të largohen menjëherë, siç thuhet në këshillën tonë të udhëtimit për në Rusi,” tha zëdhënësi.
Incidenti vjen më pak se një vit pasi ushtari amerikan, Travis King, i vendosur gjithashtu në Korenë e Jugut në atë kohë, lëvizi në Korenë e Veriut përmes zonës së çmilitarizuar shumë të fortifikuar që ndan dy vendet.
Koreja e Veriut më vonë dëboi Kingun, i cili u kthye në Shtetet e Bashkuara dhe u ngarkua për dezertim./REL
