Lideri i GERB-it, Boyko Borisov, deklaroi në Ruse se Bullgaria dhe Maqedonia e Veriut nuk janë armiq dhe se Marrëveshja për Fqinjësi të Mirë dhe Miqësi mes dy vendeve duhet të respektohet.
“Ekziston Marrëveshja për Fqinjësi të Mirë dhe Miqësi me Republikën e Maqedonisë së Veriut, e nënshkruar nga unë dhe kryeministri i tyre. As ne, as Komisioni Evropian nuk kërkojmë asgjë tjetër përveç respektimit të kësaj marrëveshjeje. Ne nuk jemi armiq, përkundrazi”, tha Borisov.
Ai theksoi se marrëveshja parashikon të drejta dhe iu referua edhe të ashtuquajturit propozim francez, duke e cilësuar atë si të qartë.
Borisov përmendi si shembull marrëdhëniet me Greqinë gjatë procesit të anëtarësimit të Bullgarisë në Bashkimin Evropian dhe bëri thirrje për dialog konstruktiv përmes kanaleve diplomatike.
“Nuk jemi armiq, përkundrazi. Nëse fqinjësinë e kuptojnë ashtu siç e kuptojmë ne, nuk do të kenë asnjë problem”, shtoi ai.
