Një ngjarje tragjike ka ndodhur pranë ujëvarës Savica në Bohinj të Sllovenisë, ku një djalë shtatëvjeçar ka rënë në një humnerë, ndërsa babai i tij 44-vjeçar, pasi dëgjoi britmat e të birit, ka shkuar drejt tij dhe gjithashtu ka rënë.
Sipas policisë sllovene, familja me katër anëtarë ishte nga një shtet i huaj dhe po vizitonte ujëvarën Savica. Deri tani nuk është bërë e ditur se nga cili shtet është familja.
Ngjarja ndodhi gjatë kthimit nga ujëvara, kur familja u ndal pranë një zone pushimi me tavolinë dhe stola. Në një moment, shtatëvjeçari u largua nga pjesëtarët e tjerë të familjes, të cilët më pas dëgjuan britmat e tij.
Babai shkoi drejt vendit nga vinin britmat, por gjatë rrugës ra në humnerë. Shpëtimtarët i gjetën të dy në shtratin e lumit Savica.
44-vjeçari nuk mundi t’u mbijetojë plagëve, ndërsa djali, i cili kishte pësuar lëndime të rënda, u transportua me helikopter në Qendrën Klinike Universitare në Lubjanë. Deri tani nuk ka informacione të reja zyrtare për gjendjen e tij shëndetësore.
Shërbimi i Shpëtimit Malor në Bohinj bëri të ditur se ekipet e tyre ndodheshin në një stërvitje pranë vendit të ngjarjes dhe mundën të niseshin pothuajse menjëherë pas marrjes së njoftimit.
Shpëtimtarët zbritën drejt shtratit të lumit, i cili ndodhej rreth 60 metra më poshtë. Ata e përgatitën fëmijën për transport me helikopter, ndërsa trupi i babait u nxor nga terreni i vështirë me ndihmën e litarëve.
Policia po vazhdon mbledhjen e informacionit për të gjitha rrethanat e aksidentit.
Shërbimi i Shpëtimit Malor në Bohinj theksoi se aksidentet në zonat malore rrallë ndodhin si pasojë e vetëm një gabimi, por zakonisht janë rezultat i një sërë rrethanash dhe vendimesh që bashkohen në një moment.
Shpëtimtarët kanë shprehur shpresën që djali të shërohet sa më shpejt dhe sa më mirë.
