Aktivistë nga Ohri kanë nisur një peticion për ajër më të pastër, ujë të sigurt, menaxhim më efikas të mbetjeve, mbrojtjen e natyrës dhe krijimin e një mjedisi më të shëndetshëm.
Iniciuesit u kanë bërë thirrje qytetarëve t’i bashkohen peticionit, duke theksuar se çështjet mjedisore kërkojnë politika dhe masa të qëndrueshme në nivel lokal dhe shtetëror.
Dragana Karasova, një nga iniciueset, tha se përmes peticionit synohet të nxitet zbatimi i masave sistematike për reduktimin e ndikimeve negative në mjedis.
Aktivistja Ivana Peneva theksoi se pasojat e zjarreve në pyje mund të vazhdojnë edhe pas shuarjes së tyre, duke përmendur ndotjen e ajrit nga grimcat e imëta, si dhe rrezikun nga erozioni dhe përmbytjet në zonat e prekura.
Sipas aktivistëve, problemet që lidhen me ajrin, zjarret, ujin dhe mbetjet duhet të trajtohen në mënyrë të koordinuar dhe përmes masave afatgjata.
Në peticion përmendet edhe një raport i UNICEF-it nga viti 2026, sipas të cilit 99.9 për qind e fëmijëve në Maqedoni janë të ekspozuar ndaj ndotjes së dëmshme të ajrit.
