Sekretari i Përgjithshëm i Kombeve të Bashkuara, Antonio Guterres, ka bërë thirrje për vendosjen e rregullave më të rrepta ndërkombëtare për inteligjencën artificiale, duke paralajmëruar për rreziqe serioze në nivel global.
Në prag të takimit të ardhshëm të liderëve botërorë në Asamblenë e Përgjithshme të OKB-së, Guterres tha se mbikëqyrja e teknologjisë do të jetë një nga temat kryesore të diskutimeve të tij me liderët.
“Është përgjegjësi e çdo qeverie të mbrojë qytetarët e saj, përfshirë edhe nga kërcënimet që sjell inteligjenca artificiale”, deklaroi Guterres.
Debati është intensifikuar edhe pas dorëheqjes së një studiuesi të kompanisë Anthropic, i cili tha se vendimi i tij lidhet pjesërisht me shqetësimet e njerëzve që zhvillojnë teknologjinë se inteligjenca artificiale mund të paraqesë rrezik serioz për njerëzimin.
Ndërkohë, presidenti amerikan Donald Trump ka shprehur një qëndrim më pak shqetësues, duke deklaruar se SHBA-ja tashmë ka mekanizma mbrojtës dhe baza ligjore për të rregulluar kompanitë që zhvillojnë inteligjencën artificiale.
Sipas Trumpit, kompanitë mund të përballen edhe me pasoja ligjore nëse shkelin rregullat ekzistuese.
