Kryetari i Komunës së Kisella Vodës dhe kryetar i ZELS-it, Orce Gjorgjievski, zhvilloi takim pune me ministrin e Kulturës dhe Turizmit, Sedat Sulejmani, ku u diskutua për bashkëpunimin institucional në prag të projektit “Shkup 2028 – Kryeqytet Evropian i Kulturës”.
Gjatë takimit u diskutuan përgatitjet për vitin 2028, hartëzimi i kapaciteteve kulturore, zhvillimi i turizmit dhe përmirësimi i bashkëpunimit ndërmjet institucioneve lokale dhe kombëtare.
Gjorgjievski dhe Sulejmani zhvilluan gjithashtu një inspektim të punimeve për rikonstruksionin e Sallës Universale në Shkup.
Gjorgjievski theksoi se titulli i Kryeqytetit Evropian të Kulturës paraqet një mundësi dhe përgjegjësi për qytetin, duke vënë në dukje nevojën për hapësira kulturore të rinovuara, mbështetje për krijimtarinë dhe kulturë më të qasshme për qytetarët.
Sa i përket Sallës Universale, ai tha se pas përfundimit të rikonstruksionit, objekti duhet t’i dorëzohet për menaxhim Qytetit të Shkupit dhe të rikthehet në funksion për artistët dhe publikun.
Sipas Gjorgjievskit, me bashkëpunim dhe planifikim të koordinuar synohet që Shkupi ta përfaqësojë denjësisht titullin në vitin 2028, ndërsa investimet dhe përfitimet kulturore të mbeten edhe pas përfundimit të vitit jubilar.
